NUR TƏFSİRİ: Ət-Tövbə surəsi / ayə 42
"Əgər qənimət yaxın, səfər qısa olsaydı, şübhəsiz, (münafiqlər) sənin ardınca gələrdilər. Amma həmin yol onlara uzaq və çətin göründü. Allaha and içəcəklər ki, əgər bacarsaydıq sizinlə birlikdə (döyüşə) çıxardıq. Onlar bu yolla özlərini həlak edirlər. Allah bilir ki, onlar yalançıdırlar.”
Nöqtələr
Bu ayə Quranın qeybi xəbərlərindəndir. Ayədə Təbuk döyüşündə hələ ki, baş verməmiş hadisə bəyan olunur. Təbuk məntəqəsi ilə Mədinə arasında uzun bir məsafə vardı. Hazırda Təbuk Hicaz sərhədində yerləşir.
İmam Baqir (ə) buyurmuşdur: "Ərəzən qəribən” deyərkən yaxın qənimət nəzərdə tutulur.”
Bildirişlər
1. Mal-mülk və dünyəvi qənimətlər həmişəlik deyil.
2. Döyüş insanların imtahana çəkilməsində gözəl meyardır.
3. Münafiqlərin içinin açılması zəruridir.
4. Münafiqlər maddi mənafe xatirinə bəzi döyüşlərdə iştirak edirlər.
5. Rahat və mənfəətli işləri öhdəyə götürmək kamillik və fədakarlıq nişanəsi deyil.
6. Müsəlmanlıq qarınqululuq və rahattələbliklə bir araya sığmır.
7. Yalan nifaqa, nifaq yalana aparır. Münafiqlər işdən boyun qaçırmaq üçün yalandan and içirdilər.
8. Yalan and münafiq işidir.
9. Bəhanə və yalanla cihadın acı sonluğu olan bədbəxtlik və fəlakətdən qaçmaq olmaz.
10. Cəbhədən fərariliyin acısı elə fərarilərə nəsib olur.